ఆఖరి మ్యాచ్‌లోనూ నిరాశే! ఏడో స్థానం కోసం జరిగిన వర్గీకరణ పోరులో భారత్‌కు ఓటమి తప్పలేదు. శుక్రవారం 2-4తో అర్జెంటీనా చేతిలో పరాజయంపాలై ఎనిమిదో స్థానంతో సరిపెట్టుకుంది. గత ప్రపంచకప్‌ (11వ స్థానం)తో పోల్చుకుంటే గౌరవప్రదమైన స్థానం దక్కించుకుంది. నిజానికి మ్యాచ్‌లో భారత్‌దే ఆధిపత్యం. మనవాళ్ల దూకుడే ఎక్కువ! కానీ.. నాలుగు నిమిషాల్లోనే ఫలితం తారుమారైంది. భారత్‌కు ఓటమి ఖాయమైంది! ఆ కొద్ది సమయంలోనే అర్జెంటీనా మూడు గోల్స్‌తో తిరుగులేని ఆధిక్యాన్ని సంపాదించింది. అప్పటివరకు 1-1తో నువ్వానేనా అన్నట్టు సాగుతున్న మ్యాచ్‌ కాస్త 4-1తో అర్జెంటీనావైపు మళ్లింది. ఆ తర్వాత భారత్‌ పోరాడినా గోల్స్‌ తేడాను 4-2కు తగ్గించిందే గానీ.. ఓటమిని దూరం చేసుకోలేకపోయింది. ప్రథమార్ధంలో భారత గోల్‌ ప్రయత్నాలన్నీ విఫలమయ్యాయి. థామస్‌ అర్జెంటో (28వ నిమిషం) అర్జెంటీనాకు 1-0 ఆధిక్యాన్ని అందించాడు. ద్వితీయార్ధంలో గానీ భారత్‌కు ఊరట లభించలేదు. విక్రమ్‌ పిళ్త్లె గోల్‌ చేసే ప్రయత్నాన్ని ప్రత్యర్థి మటియస్‌ విల్లా ప్రమాదకరంగా అడ్డుకోవడంతో భారత్‌కు పెనాల్టీ స్ట్రోక్‌ లభించింది. దాన్ని సందీప్‌ (42వ) గోల్‌ చేశాడు. మరో నిమిషానికే భారత ఆశలపై నీళ్లు! లూకాస్‌ విల్లా (43వ, 44వ), ఫకుండో కలియోని (46వ) విరుచుకుపడడంతో అర్జెంటీనా నాలుగు నిమిషాల వ్యవధిలో మూడు గోల్స్‌ సాధించి 4-1తో విజయాన్ని ఖాయం చేసుకుంది. శివేంద్ర సింగ్‌ (49వ) అర్జెంటీనా ఆధిక్యాన్ని 4-2కు తగ్గించాడు. 1978 నుంచి ప్రపంచకప్‌లో అర్జెంటీనాపై భారత్‌ ఒక్క మ్యాచ్‌ కూడా నెగ్గలేదు.

స్పెయిన్‌కు ఐదు.. కివీస్‌కు తొమ్మిది: ఇతర వర్గీకరణ మ్యాచుల్లో స్పెయిన్‌ 2-0తో దక్షిణ కొరియాను ఓడించి ఐతో స్థానంలో నిలిచింది. ఉత్కంఠభరితంగా సాగిన పెనాల్టీ షూటౌట్‌లో న్యూజిలాండ్‌ 5-4తో దక్షిణాఫ్రికాపై గెలిచి తొమ్మిదో స్థానం సాధించింది.