ఐసీసీ ఉపాధ్యక్ష రేసులోకి కొత్త అభ్యర్థి వచ్చాడు. న్యూజిలాండ్‌ క్రికెట్‌ బోర్డు ఛైర్మన్‌ అలన్‌ ఐజాక్‌ ఈ పదవికి పోటీపడే అవకాశముంది. అతని అభ్యర్థిత్వంపై క్రికెట్‌ ఆస్ట్రేలియా (సీఏ) కూడా సుముఖంగానే ఉంది. ఆస్ట్రేలియా మాజీ ప్రధాని జాన్‌ హొవార్డ్‌ను మొదట అభ్యర్థిగా నిలిపినప్పటికీ అతనికి ఐసీసీ సభ్య దేశాల మద్దతు లభించలేదు. దీంతో ఐజాక్‌కు మద్దతివ్వాలన్న నిర్ణయానికి వచ్చింది. ''మా బోర్డు తరఫున హొవార్డ్‌ను అత్యుత్తమ అభ్యర్థిగా నిలిపాం. కానీ అతనికి మద్దతు లభించలేదు. ఇక మేం మరొకరిని ప్రతిపాదించదలుచుకోలేదు. కివీస్‌ బోర్డు తమ ఛైర్మన్‌ను పోటీలో నిలపాలని భావిస్తోంది. అతనికి మద్దతివ్వాలని అనుకుంటున్నాం'' అని సీఏ ఓ ప్రకటనలో తెలిపింది.