ఘనంగా "గీతా" 30వ వార్షిక వేడుకలు

గ్రేటర్ ఇండియానాపోలిస్ తెలుగు సంఘం (గీతా) 30వ వార్షికోత్సవ వేడుకలను ఆదివారం నాడు ఇండియానాపోలిస్ లోని ఫాల్ క్రీక్ హైస్కూల్ లో ఘనంగా నిర్వహించారు. ఈ కార్యక్రమానికి హాజరయిన ప్రవాసాంధ్రులు దీపావళి సంబరాలను కూడా వేడుకగా జరుపుకున్నారు. ప్రముఖ సినీ నటులు సంజన, శివారెడ్డి నృత్య ప్రదర్శన, శివారెడ్డి మిమిక్రీ, హాస్యనటులు గుండు హనుమంతరావు, అనంత్, నటి అపూర్వలు ప్రదర్శించిన హాస్య నాటికలు ప్రేక్షకులను అలరించాయి. గాయకులు ప్రవీణ్, విజయలక్ష్మీలు ఆలపించిన గీతాలు ఆహుతులను ఉర్రూతలూగించాయి. "గీతా" పూర్వ అధ్యక్షులను, సంఘ అభివృధ్ధికి తోడ్పాటు అందించిన సభ్యులను ఈ సందర్భంగా ఙాపికలను అందజేసి సత్కరించారు. వార్షిక వేడుకల సందర్భంగా ఏర్పాటు చేసిన క్రీడా పోటీల్లో, చిన్నారులకు ఏర్పాటు చేసిన ఫ్యాషన్ షో పోటీల్లో గెలుపొందిన విజేతలకు బహుమతులను అందజేశారు. అమెరికా కాంగ్రెస్ అభ్యర్ధి మెగాఫ్ ఈ వేడుకలకు ముఖ్య అతిధిగా విచ్చేశారు. "గీతా" తదుపరి కార్యవర్గాన్ని కూడా ఈ కార్యక్రమంలో ప్రకటించారు. తదుపరి అధ్యక్షుడిగా పొణుగోటి అజయ్ ఎన్నికయ్యారు. "గీతా" అభివృధ్ధికి తన శక్తివంచన లేకుండా కృషి చేస్తానని ఆయన ఈ సందర్భంగా పేర్కొన్నారు. సాయి పిన్నమనేని, ప్రభాకర్ కాశరడ, అవుతు సాంబిరెడ్డి, రాజు చింతలలు సన్మానం అందుకున్న వారిలో ఉన్నారు. ఈ కార్యక్రమ ఏర్పాట్లను గీతా అధ్యక్షుడు సుధీర్ తొండెపు, కార్యదర్శి చింతల రాము, కోశాధికారి హరీష్, విజయపాల్ రెడ్డి, సతీష్ గజ్జల, మంగారావు, దిలీప్ వడ్లమూడి, రఘు పాటిబండ్ల, సత్యనారయణ రెడ్డి, మోహన్ దేవరాజ్, పాతూరి శ్రీహరి, తుమ్ములూరి విద్యాసాగర్ తదితరులు పర్యవేక్షించారు. కార్యక్రమానికి వ్యాఖ్యాతలుగా సందీప్ పమ్మిరెడ్డి, అనుపమ చెంగల్వలు వ్యవహరించారు.

Comments

Add New

RSS