అద్వానీ, మోడీలపై తీవ్రవాదుల గురి: కర్ణాటక

త్వరలో జరుగనున్న సార్వత్రిక ఎన్నికల సందర్భంగా రాజకీయ నాయకులను లక్ష్యంగా చేసుకొని తీవ్రవాదులు దాడులు చేయాలనుకున్నట్లు కర్ణాటక పోలీసులు సోమవారం వెల్లడించారు. గత ఏడాది బెంగళూరు బాంబు పేలుళ్ల కేసులో అరెస్టు చేసిన టీ నజీర్, సైనుద్దీన్ అనే ఇద్దరు తీవ్రవాదులు ఈ దిగ్భ్రాంతికర విషయాన్ని వెల్లడించారని పోలీసులు తెలిపారు.

ఈ ఇద్దరు తీవ్రవాదులు పాకిస్థాన్‌కు చెందిన లష్కరే తోయిబాకు చెందినవారు కాగా, వారిద్దరినీ హైదరాబాద్‌లో అరెస్టు చేశారు. రెండు నెలల క్రితం వీరిద్దరూ జమ్ము- కాశ్మీర్ రాష్ట్రంలో శిక్షణ పొందారు. బెంగళూరు పేలుళ్ల కేసులో వీరిద్దరినీ పోలీసులు విచారించారు. త్వరలో జరగబోతున్న ఎన్నికల సందర్భంగా దాడులు చేసేందుకు లష్కరే తోయిబా 2005లోనే వ్యూహరచన చేసినట్లు వీరు వెల్లడించారు.

గుజరాత్ ముఖ్యమంత్రి నరేంద్ర మోడీని హత్య చేసేందుకు సైనుద్దీన్ అనే బాంబు తాయారీ నిపుణుడిని లష్కరే తోయిబా నియమించిందని, అయితే అతను ప్రణాళిక అమలు చేయడానికి ముందే అరెస్ట్ అయ్యాడని పోలీసులు చెప్పారు.

ఇదిలా ఉంటే గత ఏడాది ఇండియన్ ముజాహిదీన్ తీవ్రవాద సంస్థకు తాము బాంబులు సరఫరా చేసినట్లు ఈ ఇద్దరు తీవ్రవాదులు అంగీకరించారు. బీజేపీ ప్రధానమంత్రి అభ్యర్థి ఎల్‌కే అద్వానీ, నరేంద్ర మోడీ, తదితర నేతలు, విశ్వహిందూ పరిషత్, ఆర్ఎస్ఎస్ నాయకులు కూడా తీవ్రవాదుల హిట్‌లిస్ట్‌లో ఉన్నట్లు ఈ ఇద్దరు తీవ్రవాదులను అరెస్టు చేయడంతో తెలిసిందని పోలీసులు వెల్లడించారు.

Comments

Add New

RSS