సంఘాలకు రూ. 20వేల కోట్లు రుణాలు మంజూరు చేయాలని కేంద్రాన్ని కోరినట్లు ముఖ్యమంత్రి వెల్లడించారు. పలువురు కేంద్రమంత్రులను కలిసిన అనంతరం ఏర్పాటు చేసిన విలేకరుల సమావేశంలో ఆయన మాట్లాడుతూ కాళహస్తిలో విద్యుత్తు పరికరాల ఉత్పత్తి పరిశ్రమను ఏర్పాటు చేయాలని కోరినట్లు చెప్పారు. దీనిని రాజస్థాన్‌లో కాకుండా ఆంధ్రప్రదేశ్‌లో ఏర్పాటు చేస్తే సత్ఫలితాలు వస్తాయని వివరించామన్నారు. హైదరాబాద్‌లోని హిందుస్థాన్‌ కేబుల్స్‌కు పునరుజ్జీవం కల్పించాలని కోరామన్నారు. విశాఖపట్నంలోని బీహెచ్‌పీవీలో ఎన్నో ఏళ్లుగా అపరిష్కృతంగా ఉన్న సమస్యలను పరిష్కరించాలని కోరినట్లు చెప్పారు. గృహ నిర్మాణాలకు సంబంధించి కేంద్రం నుంచి అధిక నిధులు విడుదల చేయాలని విజ్ఞప్తి చేశామన్నారు. శ్రీరాంసాగర్‌పై మహరాష్ట్ర ప్రభుత్వం చేపడుతున్న అక్రమ నిర్మాణాలను అడ్డుకోవాలని కోరామన్నారు. రాష్ట్రంలో గత ఐదేళ్లలో చేపట్టిన అభివృద్ధి కార్యక్రమాలపై మంత్రులు సంతృప్తి వ్యక్తం చేశారని చెప్పారు. రాష్ట్రానికి మంత్రి పదవుల్లో ప్రాధాన్యం లేకపోయినప్పటికీ నిధుల మంజూరులో మాత్రం ఢోకా ఉండదని స్పష్టం చేశారు.