గోపీచంద్‌ కథానాయకుడిగా భవ్య క్రియేషన్స్‌ సంస్థ ఓ చిత్రాన్ని నిర్మిస్తోంది. రచయిత రవి దర్శకుడిగా పరిచయమవుతున్నారు. వి.ఆనందప్రసాద్‌ నిర్మాత. దీక్షా సేథ్‌ కథానాయికగా ఎంపికైంది. ఈమె 'వేదం'లో అల్లు అర్జున్‌ సరసన నటించింది. ప్రస్తుతం రవితేజతో 'మిరపకాయ్‌'లో ఆడిపాడుతోంది. దర్శకుడు రవి గతంలో 'సత్యం', 'భద్ర', 'పరుగు', 'కింగ్‌'... తదితర చిత్రాలకు సంభాషణలు అందించారు. గోపీచంద్‌ చిత్రం ఆగస్టు 12 నుంచి చిత్రీకరణ జరుపుకొంటుంది. నిర్మాత ఆనందప్రసాద్‌ మాట్లాడుతూ ''గోపీచంద్‌ మా సంస్థకు ఆత్మీయుడు. ఆయనతో మేం నిర్మించిన 'శౌర్యం' ఘన విజయం సాధించింది. తాజా చిత్రాన్ని కూడా ప్రేక్షకుల్ని మెప్పించేలా తీర్చిదిద్దుతాం. ప్రేమ, వినోదం, యాక్షన్‌ అంశాల్ని మేళవించాం. గోపి పాత్ర విభిన్నంగా ఉంటుంద''న్నారు. ఇందులో ప్రకాష్‌రాజ్‌ ముఖ్య భూమికను పోషిస్తున్నారు. ఛాయాగ్రహణం: రసూల్‌ ఎల్లోర్‌, సంగీతం: చక్రి, పాటలు: భాస్కరభట్ల, కూర్పు: శంకర్‌, కళ: వివేక్‌, ఎగ్జిక్యూటివ్‌ నిర్మాత: అన్నే రవి.